कुनै पनि फोटोबारे जानकारी चाहियो ? क्रोम ब्राउजरमा गुगल लेन्स यसरी प्रयोग गर्नुहोस्

काठमाडौँ । इन्टरनेट चलाउँदा हामी दिनहुँ सयौं तस्बिरहरू देख्छौं । कुनै ठाउँको सुन्दर फोटो, मन परेको लुगा वा कुनै अनौठो वस्तुको तस्बिर । तर त्यो फोटो के को हो ? कहाँको हो वा त्यसमा भएको सामान कहाँ किन्न पाइन्छ भन्ने जान्न मन लाग्छ । यस्तै समस्याको समाधानका लागि गुगलले आफ्नो शक्तिशाली टुल ‘गुगल लेन्स’ (Google Lens) लाई सिधै क्रोम ब्राउजरमा समावेश गरेको छ ।

गुगल लेन्स एक भिजुअल सर्च इन्जिन हो यसले फोटोको आधारमा इन्टरनेटमा जानकारी खोज्छ । अब तपाईंले कुनै पनि वेबसाइटमा देखेको फोटोबारे तुरुन्तै जानकारी पाउन सक्नुहुन्छ । त्यो पनि नयाँ ट्याब नखोलिकनै । क्रोम ब्राउजरमा यो फिचर प्रयोग गर्ने तरिका निकै सजिलो छ ।

क्रोममा गुगल लेन्स प्रयोग गर्ने टिप्स:

१. कुनै पनि फोटोमा राइट-क्लिक गर्नुहोस्

तपाईंले कुनै पनि वेबसाइटमा आफूलाई जानकारी लिन मन लागेको फोटो देख्नुभयो भने, त्यो फोटोमा आफ्नो माउस लगेर राइट-क्लिक गर्नुहोस् । त्यहाँ देखिने मेनुमा ‘Search image with Google’ भन्ने विकल्प देखिनेछ, त्यसमा क्लिक गर्नुहोस् ।

२. साइडबारमा परिणाम हेर्नुहोस्

‘Search image with Google’ मा क्लिक गर्ने बित्तिकै तपाईंको ब्राउजरको दायाँपट्टि एउटा साइडबार खुल्नेछ । यहाँ गुगल लेन्सले उक्त फोटोसँग सम्बन्धित विभिन्न परिणामहरू देखाउँछ, जस्तै:

• फोटोसँग मिल्दोजुल्दो अन्य तस्बिरहरू ।
• यदि फोटो कुनै उत्पादन (Product) को हो भने त्यो कहाँ किन्न पाइन्छ भन्ने जानकारी ।
• फोटोमा भएको स्थान वा वस्तुको पहिचान ।

३. फोटोभित्रको टेक्स्ट कपी वा अनुवाद गर्नुहोस्

गुगल लेन्सको सबैभन्दा उपयोगी फिचरमध्ये एक हो, फोटोभित्रको टेक्स्ट (Text) पहिचान गर्नु ।

• साइडबारमा खुलेको लेन्स विन्डोमा ‘Text’ विकल्प छान्नुहोस् ।
• अब लेन्सले फोटोमा भएका सबै अक्षरहरूलाई पहिचान गर्नेछ । तपाईंले ती अक्षरहरूलाई सिधै कपी (Copy) गरेर अन्यत्र प्रयोग गर्न सक्नुहुन्छ ।
• यसका साथै, ‘Translate’ मा क्लिक गरेर फोटोमा भएको टेक्स्टलाई सीधै आफूले चाहेको भाषामा अनुवाद पनि गर्न सक्नुहुन्छ । यो फिचर कुनै विदेशी भाषामा लेखिएको मेनु वा सूचना पढ्न निकै उपयोगी हुन्छ ।

४. फोटोको निश्चित भाग मात्रै खोज्नुहोस्

कहिलेकाहीँ तपाईंलाई पूरै फोटोको नभई त्यसको कुनै एउटा सानो हिस्साको बारेमा मात्र जानकारी चाहिएको हुन सक्छ ।

• गुगल लेन्सको साइडबार खुलिसकेपछि, तपाईंले फोटोमा माउसले ड्रग गरेर आफूलाई चाहिएको भाग मात्रै छनोट गर्न सक्नुहुन्छ ।
• उदाहरणका लागि, कुनै व्यक्तिले लगाएको टिसर्ट वा जुत्ताको बारेमा मात्र खोज्नु परेमा, तपाईंले त्यति भागलाई मात्रै बक्स बनाएर छनोट गर्न सक्नुहुन्छ । गुगल लेन्सले तुरुन्तै त्यही वस्तुसँग सम्बन्धित परिणामहरू देखाउनेछ ।

समग्रमा, गुगल लेन्सले क्रोम ब्राउजरमा भिजुअल सर्चलाई निकै सरल र शक्तिशाली बनाएको छ । अर्को पटक कुनै फोटो देखेर जिज्ञासा लाग्दा, यो फिचर प्रयोग गरेर हेर्नुहोस्, तपाईंले सोचेभन्दा धेरै जानकारी पाउन सक्नुहुन्छ ।