गुगललाई टक्कर दिंदै च्याटजीपीटी, दैनिक ‘सर्च’ साढे २ अर्ब बढी

काठमाडौँ । कुनै बेला थियो, हामीलाई केही जान्नुपरे ‘गुगल गर’ (Google it) भन्थ्यौं । तर आजकल विशेषगरी युवापुस्ता र प्रविधिसँग नजिक हुनेहरूका लागि च्याटजीपीटी नयाँ साथी बनेको छ । ओपनएआईले बनाएको यो एआई च्याटबटले अहिले दैनिक २.५ अर्बभन्दा बढी प्रश्नहरूको जवाफ दिइरहेको छ । यो आँकडाले इन्टरनेटमा सूचना खोज्ने तरिकामा ठुलो परिवर्तन आइरहेको सङ्केत गर्छ । अर्कोतिर, गुगलको एक दशकभन्दा लामो साम्राज्यमाथि गम्भीर चुनौती खडा भएको देखाउँछ ।

गुगल एउटा परम्परागत सर्च इन्जिन हो । गुगलमा जब हामी केही कुरा खोज्छौं यसले हामीलाई विभिन्न वेबसाइटका लिङ्कहरू देखाउँछ, र हामीले आफूलाई चाहिने जानकारी पाउन ती लिङ्कहरू खोल्दै हेर्नुपर्छ । 

तर, च्याटजीपीटी फरक छ । यो एक संवादात्मक एआई (Conversational AI) हो । यसले हामीसँग कुराकानी गरेजस्तै गरी प्रश्नहरूको सिधा जवाफ दिन्छ । उदाहरणका लागि, यदि तपाईंले ‘सगरमाथाको उचाइ कति हो?’ भनेर सोध्नुभयो भने, च्याटजीपीटीले तपाईंलाई विभिन्न वेबसाइटका लिङ्क दिनुको सट्टा सिधा ‘सगरमाथाको उचाइ ८८४८.८६ मिटर हो’ भनेर जवाफ दिन्छ । यसले गर्दा प्रयोगकर्ताले धेरै वेबसाइट चहार्नुपर्ने झन्झटबाट मुक्ति पाउँछन् । 

यसको यही सहजता र सिधा जवाफ दिने क्षमताका कारण प्रयोगकर्ताहरू परम्परागत सर्च इन्जिनको सट्टा च्याटजीपीटीतर्फ आकर्षित भइरहेका छन् । 

च्याटजीपीटीको प्रयोगको वृद्धिदर आश्चर्यजनक छ । सन् २०२२ को अन्त्यतिर सार्वजनिक भएको यो प्लेटफर्मले छोटो समयमै करोडौं प्रयोगकर्ता बनाएको छ । डिसेम्बर २०२४ मा दैनिक करिब १ अर्ब प्रश्नोत्तरको अनुरोध ह्यान्डल गर्ने यो प्लेटफर्मले अहिले २.५ अर्बभन्दा बढी अनुरोधहरू ह्यान्डल गरिरहेको छ । च्याटजीपीटीमा सोधिने कुल प्रश्नको ३३ करोड अनुरोध त अमेरिकी प्रयोगकर्ताहरूबाट मात्रै आउँछन् । 

गुगलले हरेक दिन लगभग १४ अर्ब खोजी ह्यान्डल गर्छ । यो च्याटजीपीटीको भन्दा धेरै हो । तर, च्याटजीपीटी जसरी अगाडि बढिरहेको छ, त्यसले गुगलजस्तो स्थापित कम्पनीका लागि चिन्ता थपेको छ । 

च्याटजीपीटीको यो सफलता देखेर गुगलले पनि आफ्नो रणनीतिमा ठुलो परिवर्तन ल्याएको छ । गुगलले आफ्नो सर्च इन्जिनमा ‘जेमिनाई’ जस्ता शक्तिशाली एआई मोडललाई एकीकृत गरेको छ । अब गुगलमा केही खोज्दा, यसले लिङ्कहरू मात्र नभई ‘एआई ओभरभ्युज’ (AI overviews) को रूपमा प्रश्नको सारांशमा आधारित जवाफ पनि दिन थालेको छ । 

यसका साथै, गुगलले ‘एआई मोड’ नामक नयाँ सुविधा पनि ल्याएको छ । यसले प्रयोगकर्तालाई च्याटजीपीटीमा जस्तै गरी कुराकानी गरेर प्रश्नहरू सोध्न र विस्तृत जवाफ पाउन मद्दत गर्छ ।

च्याटजीपीटीको सफलताको पछाडि माइक्रोसफ्टको ठुलो हात छ । माइक्रोसफ्टले ओपनएआईमा अर्बौं डलर लगानी गरेको छ र च्याटजीपीटीको प्रविधिलाई आफ्नो सर्च इन्जिन ‘बिङ’ (Bing) मा समावेश गरेको छ । यसले गर्दा बिङ सर्च इन्जिन पहिलेभन्दा धेरै शक्तिशाली र उपयोगी बनेको छ । च्याटजीपीटीको सहयोगले बिङको प्रयोगकर्ता संख्या पनि १० करोड नाघेको छ । 

अहिलेको अवस्था हेर्दा सूचना खोज्ने तरिकामा ठुलो परिवर्तन आउँदैछ । प्रयोगकर्ताहरू अब केवल वेबसाइटका लिङ्कहरूमा मात्र सीमित रहन चाहँदैनन् । उनीहरूलाई सिधा, सटीक र छिटो जवाफ चाहिएको छ । च्याटजीपीटीले यही आवश्यकता पूरा गरिरहेको छ ।