८,००० मिटरभन्दा अग्ला हिमाल ५० पटक चढ्ने पहिलो व्यक्ति बने निम्स दाइ

काठमाडौं, असार २६ – विश्व प्रसिद्ध नेपाली पर्वतारोही निम्सदाइ (निर्मल पुर्जा) ले फेरि एक ऐतिहासिक सफलता हासिल गरेका छन्। सन् २०२५ जुलाई ३ मा पाकिस्तानमा अवस्थित “किलर माउन्टेन” नंगा पर्वतको शिखरमा उभिँदै, उनले ८,००० मिटरभन्दा अग्ला हिमालहरू ५० पटक सफलतापूर्वक आरोहण गर्ने विश्वकै पहिलो व्यक्ति बनेका छन्।

तीमध्ये २२ पटक त उनले बिना अक्सिजनमा नै चढेका छन्, जुन साहस र क्षमताको अद्वितीय उदाहरण हो।नंगा पर्वतलाई “जीवनकै सबैभन्दा खतरनाक यात्रा” भन्दै निम्सले यस आरोहणलाई आफ्नो जीवनको सबैभन्दा कठिन अनुभव मानेका छन्। तीव्र हिमआँधी, ब्लु आइस, र ढुंगा खसेको जोखिमबीच उनले शिखर चुमे।

यस ऐतिहासिक यात्रामा एउटा दुःखद पाटो पनि जोडिएको छ — सँगै पर्वतारोहण गरिरहेकी प्रसिद्ध महिला आरोही क्लारा कोलोचोभाको निधनले सम्पूर्ण आरोहण समुदायलाई शोकमा डुबाएको छ।यसअघि नै Netflix डकुमेन्ट्री “14 Peaks: Nothing Is Impossible” मार्फत निम्सले नेपाली शेर्पा समुदाय र नेपाली सेनाको योगदानलाई विश्वसामु चिनाएका थिए।

अहिले उनी निम्सदाइ फाउन्डेसनमार्फत पर्वत सफाइ अभियान, आपतकालीन राहत, पोर्टरहरूको आवास निर्माण, र शिक्षा क्षेत्रमा काम गरिरहेका छन्।उनको सन्देश आज पनि प्रेरणादायी छ —”ठूलो सपना देख, कडा मेहनत गर, र कहिल्यै हार नमान!”यो सफलता केवल निम्सको मात्र होइन, सम्पूर्ण नेपाली जनताको गौरव हो। असम्भवलाई सम्भव बनाउने नेपाली आत्माको यो प्रतीक संसारभर फैलिएको छ।