By Milan Sharma 
काठमाडौं – नेपाली सेनाले देशको सबैभन्दा ठूलो पूर्वाधार परियोजनामध्ये एक, काठमाडौँ–तराई द्रुतमार्ग (एक्सप्रेसवे) २०८३ सालको अन्त्यसम्म सम्पन्न हुने जनाएको छ।
सेनाका अनुसार करिब ७०.९ किलोमिटर लामो यो परियोजनाको करिब आधा काम पूरा भइसकेको छ। हालसम्म कुल निर्माणको ४३ प्रतिशत काम र ४५ प्रतिशत बजेट खर्च भइसकेको छ।
द्रुतमार्गमा ८७ भन्दा बढी पुल रहनेछन्, जसमा केही पुल ८२ मिटरभन्दा अग्ला हुनेछन्। धेरै पुलहरू अहिले अन्तिम चरणको निर्माणमा पुगेका छन्।
परियोजना प्रमुखका अनुसार, सम्पूर्ण काम २१३ अर्ब रुपैयाँभन्दा बढी लागतमा सम्पन्न नहुने र निर्धारित समयमै समाप्त हुने लक्ष्य राखिएको छ।
यो द्रुतमार्ग पूरा भएपछि काठमाडौं र तराई क्षेत्रबीचको दूरी र यात्रा समय उल्लेखनीय रूपमा घट्नेछ। यसले यातायात खर्च घटाउनुका साथै व्यापार, पर्यटन र समग्र आर्थिक वृद्धिमा ठुलो टेवा पुर्याउने अपेक्षा गरिएको छ।
विशेषज्ञहरूका अनुसार, द्रुतमार्गको सञ्चालनले देशको विकास गतिमा नयाँ उर्जा भरिनेछ र भौगोलिक रूपमा देशलाई अझ नजिक ल्याउनेछ।